نصائح لخلع البامبرز

السلام عليكم و رحمة الله و بركاته
انا لقيت ان فيه امهات كتير بتسأل فى الموضوع ده و محتارة قلت اقولكو خلاصة تجربتى و المعلومات اللى قريتها عن الموضوع ده

كنت قريت فى موقع اجنبى ايام ما كنت مقبلة على الخطوة الخطيرة دى انك تحاولى مع الطفل لمدة اسبوع لو لاقيتيه مش مستجيب بعد الاسبوع ده تبطلى و تبتدى تانى بعد شهر تقريبا (مش فاكرة قوى) و كل طفل له استعداده و ظروفه و كمان قالوا ان لو عندك 3 حاجات ماتبتديش ابدا مع طفلك
1- اذا كان هناك طفل جديد (لأن طبعا الطفل بيكون نفسيته متأثرة و اللى كان متعود أصلا بيرجع يعمل على نفسه فى الفترة دى)
2- اذا كان بعد الشر مريض فى الوقت ده
3- اذا كان هناك عدم استقرار يعنى مثلا بتنقلوا من شقة لشقة او مش مستقرين فى مكان واحد

بالنسبة للتعليم فى الشتاء انا ماجربتوش لكن صعوبته فى ان الطفل فى الشتاء بيبقى معدل البول عنده كتير لأن مافيش عرق كتير و لما هايبل لبسه هاتضطرى تغيرى اطنان من اللبس بعكس لبس الصيف ممكن يبقى بالاندر بس فأنا انصح بإن اول لما الجو يدفى شوية نبتدى
انا ابنى ابتديت معاه و هوة سنة و نص تقريبا و مانابنيش الا حرقة الدم و ماتعلمش اى حاجة فعديت الصيف ده و علمته و هوة سنتين و تلات شهور كان كبير شوية بس ده عشان استنيت لما الجو بقى كويس
و زى ماقلت على موضوع استعداد الطفل ان ابنى فى خلال يومين ماشاء الله كان ابتدى يقول عايز اعمل و يقعد على البوتى و يعمل برغم اللى حصل المرة اللى حاولت فيها قبل كدة
الطريقة السحرية اللى نفعت معاه اللى قريتها فى موقع اجنبى انك تسيبيه قالع نصه التحتانى خالص و تحطى البوتى جنبه و ده بيخليه اول لما بيتزنق بيقعد على طول من غير مايقول لأن ابنى كان مش راضى يقعد خالص و لما جربت الحكاية دى فعلا قعد من نفسه

بالنسبة لبنتى علمتهاو هية عندها سنة و نص و كانت برده بتعند جدا و مش راضية نهاااائى انها تقول عايزة اعمل (تقريبا لان شخصيتها عنيدة جدا )فضلت مغلبانى و لما كنت باغلب كنت باحطها واقفة فى البانيو كانت ساعتها بترضى تعمل فيه لما اتعذبت اسبوع كااااامل كنت خلاص قلت ده اخر يوم و هابطل الحمد لله لقيتها استجابت و عملت بس الغريبة انى ماكنتش و اقفة قصادها جايز كانت بسبب العند مش عايزة تعمل قدامى

بنت عمة بنتى كانت بتتعلم فى نفس الوقت بالظبط بس كانت مامتها عادى ساعات بتلبسها بامبرز و هية خارجة قعدت حوالى شهرين على ماتظبطت انا الحمد لله قعدت اسبوع بس و ده يدل على ان تلبيس البامبرز خلال عملية التعليم بيأخر الطفل

القواعد بتاعتى فى تعليم اولادى

اول مابابدأ التعليم البامبرز بينتهى من حياتى يعنى مابلبسوش و لا حتى فى النوم (لو عايزة تنيمى بيه يبقى لازم تقلعيه و هوة نايم قبل مايعرف انه لابسه و يعمل فيه )الخلاصة انه مايحسش تانى ابدا بالامان بتاع البامبرز

ماباخرجش نهائى الا للضرورة القصوى و طبعا مش قبل ما يبتدوا على الاقل يمسكوا نفسهم

كنت باشيل سجاجيد المنطقة اللى قعادنا فيها و باحاول انهم مايطلعوش على السرير كتير

الاكل تجهزيه من قبل كدة بحيث انك ماتضيعيش وقت كتير بعيد عنه لازم يكون تحت عينك طول اليوم و تعزمى عليه على طول

كنت باكتب كل مايعمل الساعة اللى عمل فيها عشان احسب تقريبا هوة بيعمل كل قد ايه و ابقى مترقبة لما الوقت يقرب

اللجوء الى الله فى الموضوع ده (و فى كل نواحى حياتنا طبعا) كنت على طول اقول دعاء اللهم لا سهل الا ماجعلته سهلا و انت تجعل الحزن ان شئت سهلا